Л.Оюун-Эрдэнэ, Ц.Элбэгдорж нарын "дисс"-ын араас...

Ерөнхий сайд Л.Оюун-Эрдэнэ "Улаанбаатараас ярьж байна"  нэвтрүүлгийнхээ үеэр Ерөнхийлөгч асан Ц.Элбэгдоржтой холбоотой хэд хэдэн ноцтой баримт ярьсан.

Тухайлбал, 

…Ц.Элбэгдорж Ерөнхийлөгч Х.Баттулга Ерөнхийлөгчид тамгаа солилцохдоо “…Ганцхан С.Зоригийг хөнөөсөн хэргийг л битгий сөхөөрэй, бусад нь надтай хамаагүй” гэж хэлсэн байдаг.

…2011 оны зургадугаар сарын 24-ний өдөр, Сү.Батболд даргын төрсөн өдөр. МАН ба МАХН гэж хуваах шийдвэрийг шүүх гаргасан. МАХН гэрчилгээ авч байсан. Ерөнхий шүүгч, Ерөнхий прокурор, ТЕГ-ын дарга, ЕТГ-ын дарга, АН-ын дарга болон бусад хүн Их тэнгэрт уулзсан байдаг юм. “…Та нарт би шүүхээр ялалтыг чинь баталгаажуулж өглөө шүү” гэж Элбэгдорж хэлсэн гэхчлэн хариулт нэхэх олон асуудлыг хөндсөн. Тэгвэл өнөөдөр өглөө /2024.04.09/ Ерөнхийлөгч асан Ц.Элбэгдорж түүний ярилцлагыг үзээд өөрийн байр сууриа илэрхийлэв.

Тэрээр,

...Зоригийн алуурчдыг мөрдөгчид илрүүлсэн. Хууль шүүх тогтоосон. Тэр алуурчид одоо ч сэжигтэн хэвээр. Чи Ерөнхий сайд болоод эхний хийсэн үйл, уулзсан хүнээсээ эмээж байгаа. Чи шалгагдана нэг өдөр...

...Засгийн эрх мэдлээс гадуур, Оюун-Эрдэний оролцоогүй, чиний мэдэхгүй хийгддэг хулгай дээрэм гэж байхгүй. Чи модон жорлон дотор батгана сэвж суугаа хүн шиг л зүйл ярих юм. Гэтэл тэнд хүндэрдэг хүмүүсийнх нь тоо хэдэн мянгаар нэмэгдээд байдаг. ..

...Анх талбай дээр "байнгын хорооны дарга ч болохгүй" гээд жагсаж байхад чинь би чамайг дэмжиж л байсан. Би сошиалд хүртэл бичсэн. М. Энхболдыг чирээд буулгасан. Гоё. Тэр хутга ханцуйлж өрөөнд нь ордогоос бусад нь... гэх зэргээр ярьсан нь бас л хариулт нэхэж, хууль шүүхийн өмнө хамтдаа зогсохоор сонсогдов.

Тэгвэл МАН, АН-ын лидерүүд ч энэ талаар байр сууриа илэрхийлж эхлэв.  Улаанбаатар хотын дарга Х.Нямбаатар, хотын экс дарга Э.Бат-Үүл нар ийн бичжээ.