Хүрээ амаржих газрын удирдлага М.Мөнхсайхан, Д.Цэцгээ, жижүүр эмч, төрөх тасгийн эмч нартай хариуцлага тооцоё

 

Хариуцлага алга. Хариуцлагагүй, сэтгэлгүй эмч, эмнэлгийн ажилчдад, удирдлагуудад хариуцлага тооцоё. Эмнэлгийн босгоор алхаад нулимс тоссон иргэдийн гомдол ч тасрахаа байлаа. Эрүүл мэндийн асуудлаа Монголын ард түмэн хэнд итгэж, найдаж даатгах вэ? гэсэн асуулт эзэнгүйдээд байна.

"Би ганц хүүтэй. 18 жил хүлээсэн охиноо өлгийдөх байтал өлгийг нь хаях гээд явж байна" хэмээн хоолой зангируулан ярих залуугийн яриа зүрх шимширмээр... Харин гомдолтой байгаа иргэний өөдөөс төрөх стандарт ярьж суух "Өргөө" амаржих газрын эмнэл зүй эрхэлсэн дэд захирал Д.Цэцгээгийн тайлбар арай л харгис.

"Эх барих тусламж үйлчилгээ тодорхой хэмжээгээр стандарттай байдаг. Ураг орчмын шингэн гарах нь төрөлтийг эрчимжүүлэх нэг хэлбэр учраас стандартын дагуу 8 цаг хүлээдэг" хэмээв. 8 цаг хүлээсний дараа тэд төрүүлэх үйл ажиллагааг явуулсан ч гэлээ ихэст эмгэг байсан учраас ийм эндэгдэл болсон гэх арьсаа хамгаалсан тайлбарыг хийжээ. Ийм тайлбар хийгээд ямар ч гэмшсэн шинжгүй байна гэдэг бол үнэхээр "аймшиг".

 

Ямартай ч Хүрээ амаржих газарт эндсэн нярайн асуудал дээр эмнэлгийн удирдлагууд арьсаа хамгаалж өнгөрөх гэж улиайрч байх шиг. Гэхдээ эмчийн байнгийн хяналтанд байхдаа ямар нэгэн асуудал үүсээгүй ч төрөхдөө эмч нарын сэтгэлгүй, хайхрамжгүй үйл явдлаас болж хүсэн хүлээсэн хүүхдээ тэвэрч чадаагүй эцэг эхийн гомдлыг яах вэ?

Энэ байдлаар нярайн эндэгдэл гарахад эмч, эмнэлгийн ажилчид, эмнэлгүүд нэр хүндээ бодож, өөрсдийгөө цэвэрлэж, бүх бурууг хагацал үзэн харуусаж суугаа эцэг эхчүүд рүү чихээд л өнгөрөөд байх хэрэг үү. Одоо энэ хуйвалдаж, арьсаа хамгаалдаг, арчаагүй арга барилаасаа салж, жаахан хариуцлагатай баймаар байна.